Кыргыз Республикасынын Юстиция министрлигинин алдындагы Укуктук саясат маселелери боюнча эксперттик – консультативдик кеӊеш (Юридикалык клуб) жөнүндө жобо

 Укуктук саясат маселелери

 боюнча эксперттик –  

     консультативдик кеӊештин

2019-жылдын 15-  мартындагы №1 отурумунун протоколу менен бекитилди

Кыргыз Республикасынын Юстиция министрлигинин алдындагы Укуктук саясат маселелери боюнча эксперттик-консультативдик кеӊеш

(Юридикалык клуб) жөнүндө

ЖОБО

1.      Жалпы жоболор

1. Кыргыз Республикасынын Юстиция министрлигинин алдындагы Укуктук саясат маселелери боюнча эксперттик-консультативдик кеӊеш (Юридикалык клуб) (мындан ары – Кеңеш) коомдук консультативдик-кеңешме орган болуп эсептелет.

2. Кеңештин максаты болуп укуктук жөнгө салуу механизмдерин ѳркүндѳтүү үчүн Кыргыз Республикасынын укуктук саясат маселелерине байланыштуу болгон анализ жана талкуулоо жүргүзүү саналат.

3. Кеңештин милдеттери болуп мамлекеттин укуктук саясатына талдоо жүргүзүү жана укуктук саясатты ѳнүктүрүү боюнча сунуштарды иштеп чыгуу саналат.

4. Кеңештин курамы Кыргыз Республикасынын Юстиция министрлиги (мындан ары – Юстиция министрлиги) тарабынан түзүлөт. Кеңештин жеке курамы Юстиция министрлигинин буйругу менен бекитилет.

Кеңеш төмөндөгүдөй курамда түзүлөт:

1) Кеңештин төрагасы – Кыргыз Республикасынын юстиция министри;

2) Кеңештин мүчөлөрү (макулдашуу боюнча):

- 1990-жылдан берки мезгилде кызмат ордун ээлеген Кыргыз Республикасынын экс-юстиция министрлери;

- Кыргыз Республикасынын Жогорку Кеңешинин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча комитетинин төрагасы;

- Кыргыз Республикасынын Жогорку Кеңешинин Укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин төрагасы;

- Кыргыз Республикасынын Президентинин,  Кыргыз Республикасынын Жогорку Кеңешинин, Кыргыз Республикасынын Ѳкмѳтүнүн аппараттарынын юридикалык бөлүмдѳрүнүн башчылары;

- Кыргыз Республикасынын Акыйкатчысы (Омбудсмени);

- Кыргыз Республикасынын Юстиция министрлигинин  Коомдук кеңешинин төрагасы.

        5. Кеңештин чечими менен Кеңештин курамына эл аралык уюмдардын жана жарандык коомдордун ѳкүлдѳрү кошулушу мүмкүн.

        Эл аралык уюмдардын жана жарандык коомдордун ѳкүлдѳрү, Кеңештин курамына 2 жылдык мѳѳнѳткѳ кошулушат.

        6. Кеңеш өз ишин коомдук башталыштын негизинде жүзөгө ашырат.

7. Кеңештин ишин уюштуруу-техникалык камсыз кылууну Юстиция министрлигинин түзүмдүк бөлүнүшүнөн жана  көз карандысыз эксперттерден турган катчылык камсыз кылат.

2. Кеңештин ыйгарым укуктары

8. Алдыга коюлган милдеттерди жүзөгө ашыруу максатында, Кеңеш төмөнкүлөргө укуктуу:

1) Кыргыз Республикасынын мыйзамдарын жакшыртуу боюнча сунуштарды иштеп чыгууга;

2) Кыргыз Республикасынын мамлекеттик органдарына сунуштарды берүүгө;

3) Кеңешке кароого киргизилген ченемдик укуктук актылардын долбоорлорунун концепцияларын кароого жана сунуштарды даярдоого;

4) курамына мамлекеттик органдардын, илимий мекемелердин адистерин, көз карандысыз эксперттерди киргизүү менен эксперттик жумушчу топторду түзүүгө;

5) кызыкдар тараптардын өкүлдөрүн Кеңештин отурумуна чакырууга;

6) Кеңешке жүктөлгөн милдеттерди аткарууга жана максаттарга жетүү үчүн зарыл болгон башка ыйгарым укуктарды жүзөгө ашырууга.

9. Кеңештин алдында турган милдеттерди аткаруу үчүн көз карандысыз эксперттер тартылышы мүмкүн.

10. Кеңештин төрагасы:

1) Кеңештин ишин уюштурат;

2) белгиленген мөөнөттө Кеңештин отурумун жүргүзөт жана берилген материалдарды кароо боюнча иш жүргүзөт;

3) Кеңештин отурумдарын алып барат;

4) Кеңештин отурумдарынын күн тартибин белгилейт;

5) Кеңештин  атынан чыгат;

6) Кеңештин ишин уюштуруу боюнча башка функцияларды аткарат.

11. Кеңештин мүчөсү төмөнкүлөргө укуктуу:

1) Кеңештин отурумунун күн тартиби жана алып баруу тартиби боюнча сунуш киргизүүгѳ;

2) күн тартибине киргизилген маселелерди талкуулоого катышууга;

3) кезексиз отурум чакыруу боюнча сунуш киргизүүгө;

4) талкуулануучу маселелер боюнча добуш берүүгө катышууга;

5) Кеңештин отурумунун күн тартибине киргизилген маселелер боюнча баяндамачы же кошумча баяндамачы катары чыгып сүйлөөгө;

6) бардык даярдалган материалдарды иликтеп чыгууга жана алар боюнча сын-пикирлерди жана сунуштарды берүүгө.

12. Кеңештин катчылыгы:

1) Кеңештин кезектеги отурумунун күн тартибин даярдайт жана таратат;

2) Кеңештин отурумдарынын протоколун жүргүзөт жана аны менен  Кеңештин мүчөлөрүн жана кызыкдар жактарды кабардар кылат;

3) Кеңештин отурумдарын уюштурат;

4) көз карандысыз эксперттер тарабынан иштерди аткаруу ишмердүүлүгүн координациялайт;

5) Кеңешке көз карандысыз эксперттер тарабынан аткарылган иштердин жыйынтыгын берет;

6) Кеңештин ишмердүүлүгүн уюштуруу үчүн зарыл болгон башка функцияларды аткарат.

3. Кеңештин ишин уюштуруу

13. Кеңештин отурумдары зарылдыгына жараша, бирок жарым жылда бир жолудан кем эмес өткөрүлөт.

14. Кеңештин отурумунун күн тартибинин долбоору ар бир айрым маселелер боюнча баяндамачыны көрсөтүү менен төмөнкүлөрдүн негизинде түзүлөт:

1) эксперттер тарабынан даярдалган материалдардын;

2) Юстиция министрлигинин сунуштарынын;

3) Кеңештин мүчөлөрүнүн жана/же кызыкдар субъекттердин сунуштарынын.

15. Кеңештин төрагасы тарабынан жактырылган отурумдун күн тартибинин долбоору отурумдун датасына чейин 10 жумушчу күндөн кечиктирбестен тиешелүү материалдары менен Кеңештин катчылыгы тарабынан Кеңештин мүчөлөрүнө жиберилет.

16. Кеңеш карала турган маселелердин ар бири боюнча коллегиялык түрдө талкуулайт жана катышкандардын санынын көпчүлүк добушу менен чечим кабыл алат.

17. Кеңештин чечимдери протокол менен таризделет. Протоколду Кеңештин катчылыгы жазат жана Кеңештин төрагасы кол коёт.

18. Кеңештин чечими Кеңештин катчылыгы тарабынан кызыкдар субъекттерге Кеңештин отурумунун протоколунан көчүрмө түрүндө жеткирилет.

             _____________________________________________________