КОММЕРЦИЯЛЫК ЭМЕС УЮМДАРДЫ МАМЛЕКЕТТИК КАТТОО ЖОЛ-ЖОБОСУН ӨТКӨРҮҮ ТАРТИБИ, ЗАРЫЛ БОЛГОН ДОКУМЕНТТЕРДИН ТИЗМЕГИ ЖАНА ЧЕЧИМДЕРДИН ҮЛГҮЛӨРҮ (КБ, КФ, ТМШ, ДБ, СП, М-е, АБ, АК, ж.б.түрүндө)

Юридикалык жактарды, филиалдарды (өкүлчүлүктөрдү) жана ММК каттоо > Мамлекеттик каттоо жол-жобосун өткөрүү тартиби жана зарыл болгон документтердин тизмеги жана үлгүлөрү >

1. Коммерциялык эмес уюмдарды мамлекеттик каттоодон өткөрүү үчүн уюштуруучу (уюштуруучулар) төмөнкүлөрдү аткаруусу зарыл:

- юридикалык жакты түзүү жөнүндө чечимди кабыл алуу;

- юридикалык жактардын, филиалдардын (өкүлчүлүктөрдүн) Бирдиктүү мамлекеттик реестринде камтылган, башка юридикалык жактардын фирмалык аталышынан айырмаланган фирмалык аталышты тандоо;

- юридикалык жактар өз фирмалык аталыштарында Кыргыз Республикасынын мамлекеттик жана расмий тилдеринде тийиштүүлүгүнө жараша кыргыз, орус алфавиттеринин тамгаларын гана, ал эми англис тилинде - латын алфавитинин тамгаларын пайдаланууга тийиш. Мисалы:

Ø Мамлекеттик тилдеги толук фирмалык аталышы:

"КФК" коомдук фонду

Ø Расмий тилдеги толук фирмалык аталышы:

Общественный фонд "КФК"

(Туура эмес фирмалык аталыш: ~~"КФК"(«~~~~KFK»)~~ ~~коомдук фонду~~)

2. Мамлекеттик каттоонун мөөнөттөрү

Юридикалык жакты мамлекеттик каттоо документтерди тапшыргандан учурдан тартып төмөнкүдөй мөөнөттөрдө жүзөгө ашырылат:

ü коммерциялык эмес уюмдар - 10 календардык күндѳ;

ü саясий партиялар - 30 календардык күндѳ.

3. Коммерциялык эмес уюмдарды мамлекеттик каттоо үчүн зарыл болгон документтердин тизмеги:

- Кыргыз Республикасынын Өкмөтүнүн 2011-жылдын 28-январындагы № 31 токтому менен бекитилген түр боюнча каттоо арызы;

- мамлекеттик каттоо жөнүндө чечимдин түп нускасы;

- коммерциялык эмес уюмдун жетекчисинин колтамгасы коюлган эки нускадагы устав;

- фамилиясын, атын, атасынын атын, туулган жылын, шайлануучу кызмат орунду көрсөтүү менен жетектөөчү органдын мүчөлөрүнүн тизмеси;

- фамилиясын, атын, атасынын атын, туулган жылын жана даректерин көрсөтүү менен уюштуруучулардын тизмеси, мында алардын колу нотариалдык күбөлөндүрүлүшү керек (качан уюштуруучу катары юридикалык жак чыкса толук фирмалык аталышы, каттоо (кайра каттоо) датасы жана юридикалык жактын каттоо маалыматтары көрсөтүлөт. Юридикалык жактын жетекчисинин колу тизмеде юридикалык жактын мөөрү менен бекитилет же нотариалдык күбөлөндүрүлөт);

- уюштуруучунун паспортунун көчүрмөсү (жеке жактын) (коомдук бирикмелердин, турак жайдын менчик ээлеринин шериктештиктеринин, диний уюмдардын, саясий партиялардын, профсоюздук уюмдардын түзүүчүлөрүн кошпогондо);

- уюштуруучуну (юридикалык жакты) мамлекеттик каттоо (кайра каттоо) жөнүндө күбөлүктүн көчүрмөсү - эгерде ал жергиликтүү юридикалык жак болуп эсептелинсе;

- мамлекеттик реестрден легалдаштырылган көчүрмө же өз өлкөсүнүн мыйзамдары боюнча уюштуруучу иштөөдөгү деп саналгандыгын (юридикалык жак) тастыктаган башка документ - эгерде ал чет өлкөлүк юридикалык жак болуп эсептелинсе.

Кыргыз Республикасы катышуучу болгон (КМШ өлкөлөрү) тиешелүү эл аралык келишимдерге жана макулдашууларга катышуучу мамлекеттердин юридикалык жактары үчүн документтерди легалдаштыруу талап кылынбайт;

- түзүлүп жаткан юридикалык жактын жетекчисинин паспортунун көчүрмөсү;

- ишеним каттын түп нускасы - эгерде жак ишеним каттын негизинде иш алып барса.

Кошумча берилет:

- Саясий партия – саясий партиянын программасы;

- Юридикалык жактардын бирикмеси – эки нускадагы уюштуруу келишими;

- Диний уюм, диний окуу жайы – дин иштери боюнча ыйгарым укуктуу мамлекеттик органда эсепке алынышын катталгандыгын тастыктаган документтин көчүрмөсү;

- ТМШ - уюштуруу чогулушуна катышкан менчик ээлеринин тизмеси.

Кошумча маалымат

1. Коммерциялык эмес уюмду мамлекеттик каттоо жөнүндө чечим милдеттүү түрдө төмөнкүлөрдү камтышы зарыл:

- катталуучу юридикалык жактын мамлекеттик жана расмий тилдердеги фирмалык аталышы;

- жайгашкан жери (юридикалык дареги);

- фамилиясын, атын, атасынын атын, жашаган жерин (жеке жактар үчүн), толук фирмалык аталышын, жайгашкан жерин (юридикалык жактар үчүн) көрсөтүү менен, ар бир уюштуруучу жөнүндө маалыматтарды (үй жана жумушчу телефондору, жеке жактын туулган жылы, юридикалык жактын мамлекеттик каттоонун датасы менен номери коомдук фонд менен мекемени түзүүдө кошо көрсөтүлөт);

- уюштуруучулар фондго (мекемеге) өткөрүп берүүчү мүлктүн акчалай жана (же) башка түрдөгү жалпы наркын жана аны өткөрүп берүүнүн тартибин;

- уставды, уюштуруу келишиминин бекитүү жөнүндө;

- Башкармалыгынын жана Байкоо кеңешинин мүчөлөрүнүн фамилиясы, аты, атасынын аты (фонд менен мекемени түзүүдө алардын даректери кошо көрсөтүлөт), ошондой эле төмөнкү текстти:

«Юридикалык жакты түзүү жөнүндө уюштуруучунун (уюштуруучулардын) чечиминде андагы көрсөтүлгөн маалыматтардын, ошондой эле мамлекеттик каттоо үчүн тапшырылган документтердеги маалыматтардын аныктыгы, юридикалык жакты түзүү маселелери тиешелүү мамлекеттик жана (же) жергиликтүү өз алдынча башкаруу органдары менен макулдашылгандыгы ырасталат».

2. Коммерциялык эмес уюмду түзүү, коммерциялык эмес уюмдун уставын бекитүү жана башкаруу органдарын түзүү жөнүндө чечимге, Кыргыз Республикасынын мыйзамдарында белгиленген учурларды кошпогондо, чогулуштун төрагасынын жана катчысынын колтамгасы коюлат жана алардын колтамгалары нотариалдык күбөлөндүрүлүүгө тийиш;

3. Коммерциялык эмес уюмдун уюштуруучусу бир жеке жак болгон учурда, жогоруда көрсөтүлгөн чечимге ушул уюштуруучунун колтамгасы коюлат жана анын колтамгасы нотариалдык күбөлөндүрүлөт;

4. Коммерциялык эмес уюмдун уюштуруучусу бир юридикалык жак болгон учурда, жогоруда көрсөтүлгөн чечимге уюштуруучу-юридикалык жактын жетекчисинин колтамгасы коюлат жана анын колтамгасы юридикалык жактын мөөрү менен бекитилет же болбосо нотариалдык күбөлөндүрүлөт;

5. Билим берүү уюмунун уставы билим берүү жаатындагы ыйгарым укуктуу мамлекеттик орган менен макулдашылгандан кийин юстиция органдарында каттоодон өтүүгө тийиш;

6. Коомдук бирикме үчтөн кем эмес аракетке жөндөмдүү жеке жак тарабынан аныкталган же аныкталбаган мөөнөткө түзүлөт;

7. Коомдук бирикменин мүчөлөрү болуп жеке жактар гана боло алат;

8. Коомдук фонд бир же андан көп укукка жөндөмдүү жеке жана (же) юридикалык жактар тарабынан түзүлүшү мүмкүн;

9. Диний уюм жашы жеткен жана Кыргыз Республикасынын аймагында туруктуу жашаган Кыргыз Республикасынын эки жүздөн кем эмес жаранынын демилгеси боюнча түзүлөт;

10. Диний окуу жайы юстиция органдарында катталган диний уюм тарабынан түзүлөт;

11. ТМШ 3 төн кем эмес турак-жай менчик ээлеринин демилгеси боюнча түзүлөт;

12. Саясий партиялар Кыргыз Республикасынын кеминде 10 жаранынын көтөргөн демилгеси боюнча түзүлөт;

13. Эки же андан көп адвокат адвокаттар коллегиясын уюштурууга укуктуу;

14. Эки же андан көп адвокат адвокаттар бюросун уюштурууга укуктуу;

15. Чет тилде түзүлгөн документтер каттоочу органга мамлекеттик же расмий тилдеги нотариалдык күбөлөндүрүлгөн котормосу менен кошо тапшырылат.

Коммерциялык эмес уюмдардын чечимдеринин жана уставтарынын үлгүлөрү

КФнын 2 жана андан көп уюштуруучуларынын чечими
(Жүктөп алуу)

__________________________________________________________