Кыргыз Республикасынын Юстиция министрлигинин коллегиясы жөнүндө жобо

                                                                                                                                              Кыргыз Республикасынын           
                                                                                                                                              Юстиция министрлигинин 
                                                                                                                                              2023-жылдын 10-апрелиндеги
                                                                                                                                              № 68 буйругуна тиркеме

Кыргыз Республикасынын Юстиция министрлигинин

коллегиясы жөнүндө жобо

1. Жалпы жоболор

1.1. Кыргыз Республикасынын Юстиция министрлигинин коллегиясы жөнүндө жобо (мындан ары - Жобо) Кыргыз Республикасынын юстиция системасынын ишине тиешелүү бир кыйла маанилүү чечимдерди даярдоо, талкуулоо, кабыл алуу жана ишке ашыруу жол-жоболорун регламенттештирүү максатында, Кыргыз Республикасынын Өкмөтүнүн 2021-жылдын 5-мартындагы № 78 токтому менен бекитилген Кыргыз Республикасынын Юстиция министрлиги жөнүндө жобого ылайык иштелип чыккан.

1.2. Кыргыз Республикасынын Юстиция министрлигинин коллегиясы (мындан ары – Коллегия) Кыргыз Республикасынын Юстиция министрлигинин (мындан ары - Юстиция министрлиги) иш чөйрөсүнө таандык негизги маселелерди караган туруктуу иштөөчү консультациялык-кеңешүүчү мамлекеттик-коомдук жогорку башкаруу органы болуп саналат.

1.3. Коллегия өз ишинде Кыргыз Республикасынын Конституциясын, Кыргыз Республикасынын мыйзамдарын, Кыргыз Республикасынын Президентинин жарлыктарын жана буйруктарын, Кыргыз Республикасынын Министрлер Кабинетинин токтомдорун жана буйруктарын, ошондой эле ушул жобону жетекчиликке алат. 

2. Коллегиянын негизги милдеттери жана функциялары

2.1. Иштин белгиленген чөйрөсүндө мамлекеттик саясатты ишке ашыруу боюнча чечимдерди даярдоо жана кабыл алуу.

2.2. Ченемдик укуктук жөнгө салуу, соттук-эксперттик, адвокаттык, нотариалдык, пробациялык жана жазык-аткаруу иши жаатындагы мамлекеттик саясатты жана улуттук максаттуу программаларды иштеп чыгууга жана ишке ашырууга байланышкан маселелер боюнча чечимдерди даярдоо жана кабыл алуу.

2.3. Юстиция органдарынын системасынын иштешинин принципиалдуу маселелери боюнча чечимдерди даярдоо жана кабыл алуу.

2.4. Борбордук аппараттын түзүмдүк бөлүмдөрүнүн, аймактык жана ведомстволук бөлүмдөрдүн ишинин жыйынтыктарын отчеттук мезгилде кароо.

2.5. Юстиция министрлигинин компетенциясынын чегинде ченемдик укуктук жөнгө салуу, соттук-эксперттик, адвокаттык, нотариалдык, пробациялык жана жазык-аткаруу иши жаатындагы мамлекеттик саясаттын башка маселелерин кароо. 

3. Коллегиянын курамы

 3.1. Коллегиянын сандык жана персоналдык курамы юстиция министри тарабынан бекитилет.

Коллегиянын курамына милдеттүү түрдө:

- юстиция министри;

- юстиция министринин биринчи орун басары;

- министрдин орун басарлары;

- Кыргыз Республикасынын Президентинин Администрациясынын өкүлү кирет.

Юстиция министрлигинин борбордук аппаратынын түзүмдүк бөлүмдөрүнүн, аймактык жана ведомстволук бөлүмдөрүнүн жетекчилери юстиция министринин чечими боюнча анын мүчөлөрү боло алат.

3.2. Кыргыз Республикасынын юстиция министри Коллегиянын төрагасы (мындан ары - төрага) болуп саналат, Коллегиянын ишин түздөн-түз жетектейт жана анын ишин уюштурат.

3.3. Коллегиянын мүчөлөрү:

- каралган маселелер боюнча сунуштарды киргизүүгө;

- Коллегиянын жыйындарында бардык маселелерди талкуулоого катышууга;

- принциалдуу каршы пикирлер же сын-пикирлер болгон учурда өзүнүн өзгөчө пикирин жазуу жүзүндө берүүгө укуктуу, ал Коллегиянын жыйынынын протоколунда чагылдырылат;

- Коллегиянын төрагасына Коллегиянын жыйынында кароо үчүн маселелерди киргизүү жөнүндө сунуш киргизүүгө;

- Коллегиянын төрагасына оперативдүү чечүүнү талап кылган маселелер боюнча Коллегиянын кезексиз жыйынын өткөрүү жөнүндө сунуш киргизүүгө укуктуу. 

4. Коллегиянын иш тартиби жана аны уюштуруу

4.1. Коллегиянын иши министрдин төрагалыгы алдында, ал эми ал болбогон учурда же анын тапшыруусу боюнча министрдин биринчи орун басарынын (Коллегиянын төрагасынын орун басарынын) төрагалыгы алдында жыйын формасында жүргүзүлөт.

Коллегиянын жыйындары Коллегиянын төрагасы бекиткен коллегияларды өткөрүүнүн жылдык планына ылайык, бирок жылына бир жолудан кем эмес өткөрүлөт. Коллегиянын кезексиз жыйындары төраганын же коллегия мүчөлөрүнүн демилгеси боюнча өткөрүлөт. Коллегиянын кезексиз жыйынын өткөрүү жөнүндө чечимди Коллегиянын төрагасы кабыл алат.

Коллегиянын иш планы календардык жылга Юстиция министрлигинин түзүмдүк бөлүмдөрүнүн сунуштарынын, юстиция министринин көрсөтмөлөрүнүн, Коллегиянын чечимдеринин негизинде түзүлөт жана Коллегиянын жыйынында бекитилет.

4.2. Эгер ага коллегия мүчөлөрүнүн жарымынан көбү катышса Коллегиянын жыйындары мыйзамдуу болот. Коллегиянын мүчөлөрү жыйындарга өз добушун берүү (өткөрүп берүү) укугусуз жеке өзү катышат. Коллегиянын жыйынына төраганын кароосу боюнча кеңеш берүүчү добуш укугу менен чакырылган адамдар катыша алат, жарыш сөзгө чыгып сүйлөй алат, сунуштарды, сын-пикирлерди киргизе алат, суроолорду, маалымкаттарды бере алат.

4.3. Коллегиянын жыйынында протокол түзүлөт, ага Коллегиянын төрагасы жана катчысы кол коет.

4.4. Коллегия мүчөлөрүнүн иши негизги жумуш убактысында жүргүзүлөт жана кошумча акы төлөнбөйт.

4.5. Ишти пландоо тартиби, жыйындарды уюштуруу, кароо үчүн материалдарды даярдоо, Коллегиянын чечимдерин ишке ашыруу тартиби Юстиция министрлигинин регламентинде аныкталат.

 5. Коллегиянын чечимдери

 5.1. Коллегиянын чечими жөнөкөй көпчүлүк добуш менен кабыл алынат. Добуштар бирдей болгон учурда төрага добуш берген чечим кабыл алынат.

5.2. Коллегиянын чечимдери Кыргыз Республикасынын Юстиция министрлигинин борбордук аппаратынын түзүмдүк бөлүмдөрү, ведомстволук жана аймактык органдары тарабынан аткарууга милдеттүү болгон токтомдор түрүндө кабыл алынат.