Жеке нотариалдык ишти жүргүзүү укугуна лицензия алууга талапкер адамдын такшалуудан өткөрүү ТАРТИБИ

Нотариат > Нотариалдык ишти жөнгө салган локалдык актылар >

8-тиркеме

Жеке нотариалдык ишти жүргүзүү укугуна лицензия алууга

талапкер адамдын такшалуудан өткөрүү

ТАРТИБИ

1. Жалпы жоболор

1. Бул Жобо “Нотариат жөнүндө” Кыргыз Республикасынын Мыйзамынын 4–беренесине ылайык, жеке нотариалдык ишти жүргүзүү укугуна лицензия алууга талапкер адамдын такшалуудан өтүү тартибин жана шарттарын жөнгө салат.

2. Жеке нотариалдык ишти жүргүзүү укугуна лицензия алууга квалификациялык экзамен тапшыруу үчүн нотариалдык аракеттерди жасоо жана нотариалдык иш жүргүзүүнү уюштуруу жөнүндө практикалык көндүмдөрүн алуу, ошондой эле такшалуудан өтүүнүн максаты кесиптик билимин жогорулатуу болуп саналат.

2. Такшалуудан өтүү тартиби

3. Жеке нотариалдык ишти жүргүзүү укугуна лицензия алууга адам (мындан ары – такшалуучу) такшалуудан өтүү жөнүндө арыз менен Кыргыз Республикасынын Юстиция министрлигине (мындан ары – Юстиция министрлиги) кайрылууга тийиш.

4. Такшалуудан өтүү үчүн төмөнкү документтер тапшырылат:

1) жеке нотариалдык ишти жүргүзүү укугуна лицензия алуу үчүн 3–айлык такшалуудан өтүүгө арыз (арыздын формасы Юстиция министрлигинин буйругу менен бекитилет) жана Юстиция министрлигинин расмий сайтына жайгаштырылат;

2) тийиштүү түрдө толтурулган жана сүрөтү менен жеке колу коюлган кадрларды эсепке алуу боюнча жеке баракча;

3) талапкердин инсандыгын тастыктоочу жана Кыргыз Республикасынын жарандыгына таандыктыгын тастыктоочу документтер;

4) жогорку юридикалык билими жөнүндө дипломдун нотариалдык күбөлөндүрүлгөн көчүрмөсү (эгер жогорку юридикалык билим экинчи жогорку билим катары алынса, 1–дипломду милдетүү берүү, же кесептик орто билим дипломду берүү);

5) акыркы иштеген жери боюнча же тигилген жана нотариалдык күбөлөндүрүлгөн эмгек китепчесинин көчүрмөсү;

6) берилген күнүн жана ордун көрсөтүү менен акыркы иштеген жеринен мүнөздөмө;

7) өмүр баян;

8) сүрөт (көлөмү: 4х6, түстүү);

9) мурда аскердик кызматты же укук коргоо органдарында кызмат өтөгөн, мамлекеттик органдарда иштеген адамдарга кызмат өтөө тизмесинин күбөлөндүрүлгөн көчүрмөсү (маалымкат–объективка) кошумча берилет;

10) такшалуудан өтүү жөнүндө жеке нотариус менен түзүлгөн келишим;

11) мамлекеттик алым төлөнгөндүгү жөнүндө квитанция;

12) жеке папка;

13) өздүк ишинин тизмеси;

5. Документтер кабыл алынгандан кийин Юстиция министрлигинин нотариат маселелери боюнча түзүмдүк бөлүмү суроо–талаптарды жиберет:

1) Кыргыз Республикасынын Ички иштер министрлигине (талапкердин соттуулгондугу же соттолбогондугу жөнүндө маалыматтарды алуу үчүн);

2) Кыргыз Республикасынын Социалдык фондуна (иштөө мезгилдери жөнүндө маалыматтарды алуу үчүн), анын ичинде анын ичинде “Түндүк” электрондук кызмат көрсөтүүлөр мамлекеттик порталы аркылуу кайрылууга укуктуу;

3) Республикалык психиатрия жана наркология борбору (наркологиялык же психоневрологиялык диспансерде каттоодо тургандыгы же турбагандыгы жөнүндө маалымат алуу үчүн).

Суроо–талаптардын натыйжалары такшалуучунун өздүк делосуна тиркелет.

6. Кыргыз Республикасынын Юстиция министрлигинин алдындагы Жеке нотариалдык ишти жүргүзүү укугуна лицензия алууга талапкер адамдардан квалификациялык экзаменди кабыл алуу боюнча квалификациялык комиссия (мындан ары – Квалификациялык комиссия) жогорку юридикалык билимди, юридикалык адистик боюнча эмгек стажын талап кылган кызматтардагы ишти (кызматты) тактоо зарыл болсо, талапкерлер тарабынан берилген документтер менен маалыматтардын аныктыгын текшерүүгө, ушул себептен тиешелүү мамлекеттик органдарга, жергиликтүү өз алдынча башкаруу органдарына, башка уюмдарга анын ичинде “Түндүк” электрондук кызмат көрсөтүүлөр мамлекеттик порталы аркылуу сунушталган документтер менен маалыматтардын аныктыгын текшерүү же тастыктоо жөнүндө суроо–талап менен кайрылууга укуктуу.

7. Документтерди текшерүү аяктагандан кийин, Квалификациялык комиссия такшалууга жиберүү же андан баш тартуу жөнүндө чечим кабыл алат.

8. «Нотариат жөнүндө» Кыргыз Республикасынын Мыйзамынын 4–беренесинин талаптарына ылайык келбеген адамдарга такшалуудан өтүүгө жол берилбейт.

9. Такшалуудан өтүүгө уруксат берилген адамдарга, мамлекеттик же жеке нотариустан өтүү Юстиция министрлигинин чечими менен жүзөгө ашырылат.

10. Такшалуучунун ишине жетекчилик нотариус тарабынан жүргүзүлөт, ага бул функциялар Юстиция министрлигинин буйругу менен жүктөлөт.

11. Такшалууну жеке нотариустан өтүүнү каалаган адам, аны менен нотариустун ортосунда түзүлгөн келишимди берет.

12. Такшалуучуну, беш жылдык нотариалдык иш тажрыйбасы бар болгон жеке нотариуска такшалуудан өтүүгө жиберилет.

13. Такшалууга жөнөтүү жөнүндө Юстиция министрлигинин буйругу чыккан күндөн тартып, такшалуучу эки айдан кечиктирбестен такшалуудан өтүүнү башташы керек.

14. Такшалуудан өтүү түздөн–түз квалификациялык экзаменди тапшыруунун алдында жүргүзүлөт, бул учурда такшалуу аяктаган учурдан тартып квалификациялык экзаменди тапшырганга чейинки убакыт алты айдан ашпоого тийиш.

15. Такшалуудан өтүү мөөнөтү үч айдан кем эмес убакытты түзөт жана кыскартылбайт.

16. Такшалуунун жетекчиси графикке ылайык, такшалуучунун иш жүзүндө иштеген убактысын эсепке алат.

17. Такшалуучунун жүйөлүү себептер боюнча болбогон убактысы, дарыланган учурда же такшалуучунун толук эмес жумуш убактысы мезгилинде, иштебеген убакыт такшалуу мезгили болуп саналбайт.

Мындай учурда, такшалуунун мөөнөтү такшалуунун жетекчиси тарабынан узартылышы мүмкүн, анда такшалуунун жетекчиси Юстиция министрлигине жазуу жүзүндө билдирүүгө тийиш.

18. Мамлекеттик нотариустан такшалуу өтүү мезгилинде, такшалуучуга мамлекеттик нотариустун эмгек шарттары, ички эмгек тартибинин эрежелери колдонулат. Такшалуучуга эмгек акы төлөнбөйт.

19. Жеке нотариустан такшалууну өтүп жаткан такшалуучунун укуктары жана милдеттери келишим менен аныкталат.

20. Такшалуучу жасалган нотариалдык иш–аракеттердин сырын сактоого милдеттүү.

21. Такшалуудан өтүп жаткан адам жөнүндө, нотариаттын бирдиктүү маалымат тутуму аркылуу нотариустар Юстиция министрлигине такшалуу башталган учурдан тартып ушул Тартиптин 1–тиркемесине ылайык форма боюнча маалыматтарды берүүгө милдеттүү.

22. Юстиция министрлиги тарабынан бекитилген такшалуу программасына ылайык такшалуу өтөт. Такшалуу программасы такшалуунун жетекчилери жана такшалуучулар үчүн милдеттүү болуп саналат.

23. Программа нотариалдык иш–аракеттерди жасоону өркүндөтүү жана нотариустун ишин уюштуруу боюнча практикалык көндүмдөрдү такшалуучунун алуусуна багытталган иш–чаралардын тизмесин камтууга тийиш, жана Тартиптин 2–тиркемесине ылайык формада түзүлүүгө тийиш.

24. Такшалуу программасынын негизинде такшалуунун жетекчиси үч күндүн ичинде такшалуудан өткөрүү жеке планын жана графигин бекитет. Жетекчи тарабынан бекитилген такшалуудан өткөрүү жеке планы жана графиги нотариус тарабынан үч күндүн ичинде такшалуучунун өздүк ишине тиркөө үчүн Юстиция министрлигине жиберилет. Такшалуудан өтүү графиги өзгөргөн учурда, жетекчи аны Юстиция министрлигине жиберүүгө тийиш.

25. Такшалуу өтүү мезгилинде такшалуучу такшалуунун жетекчисинин алдында нотариалдык аймагына келгендерди кабыл алууну уюштурууну, келип түшкөн кат–кабарларды каттоону жана эсепке алууну; кириш жана чыгыш кат–кабарларды каттоону; көктөмөлөрдүн номенклатурасын түзүүнү; китептерди, эсепке алуу журналдарын жана наряддарды жүргүзүүнүн тартибин; статистикалык отчеттуулукту түзүүнү; нотариалдык күбөлөндүрүлгөн документтерди архивде сактоого даярдоо тартибин; көктөмөлөрдү түзүүнү жана аларды кийинки сактоого даярдоону; туруктуу жана убактылуу сакталуучу документтерди иргеп алууну изилдейт.

26. Такшалуучу нотариалдык иш–аракеттерди жасоого катышууга жана такшалуунун жетекчисинин көрсөтмөсү боюнча нотариалдык документтердин (ишеним каттар, арыздар, макулдуктар, мыйзам боюнча мурастоо укугу жөнүндө күбөлүк; керээз; жалпы биргелешкен менчик укугунда мүлкү бар жубайлардын жана башка адамдардын жалпы мүлктөгү үлүшүнө менчик укугу жөнүндө күбөлүк; жарандын тирүү экендиги жөнүндө күбөлүк; жарандын белгилүү бир жерде тургандыгы жөнүндө күбөлүк; келишимдердин долбоорлорун даярдоого тийиш: кыймылсыз мүлктү ээликтен ажыратуу жөнүндө; мүлктү акысыз пайдаланууга берүү же ижарага берүү жөнүндө; мүлктү пайдалануу тартиби жөнүндө келишим; мүлктү бөлүштүрүү жөнүндө келишим; нике келишими; алименттик макулдашуу; жана Нотариат жөнүндө мыйзамдарга ылайык башка документтер) долбоорлорун даярдоого тийиш.

27. Такшалуучу нотариаттын ишин жөнгө салуучу мыйзамдык жана башка ченемдик укуктук актыларды, анын ичинде нотариустун этика кодексин өз алдынча изилдейт.

3. Такшалуунун аякташы

28. Такшалуу аяктагандан кийин такшалуучунун жетекчиси анын жыйынтыгы жөнүндө корутундуну түзөт, анда такшалуунун мазмуну жана натыйжалары, такшалуунун жүрүшүндө такшалуучунун жалпы даярдыгынын даражасы чагылдырылат.

29. Корутундунун типтүү түзүмү төмөнкү бөлүмдөрдү камтыйт:

1) киришүү (такшалуу жеринин кыскача мүнөздөмөсү, нотариалдык кеңсесинин функциялары, такшалуунун максаттары, такшалуудан өтүүнүн жүрүшүндө жетишилген натыйжалар);

2) негизги бөлүк (такшалуунун программасынын аткарылышынан турган жана такшалуунун профили боюнча ченемдик – укуктук документтерге жалпы баяндаманы камтууга тийиш, материалдын кыскача, бирок толук баяндалышы керек, такшалуучунун иши баяндалат, аткарылган иш–аракеттер баяндалат, алынган натыйжалар келтирилет);

3) корутунду (такшалуунун жалпы баасын камтыйт, такшалуунун жыйынтыктары жалпыланат, тыянактар такшалуунун мазмунун чагылдырат, такшалуунун жүрүшүндө такшалуучунун жалпы даярдыгынын даражасы көрсөтүлөт).

30. Корутундуга нотариус кол коет, күнүн көрсөтүү менен ага мөөр басылат жана Юстиция министрлигине коштомо кат менен жөнөтүлөт.

31. Корутундунун бир нускасы такшалуучунун жетекчисинде, экинчиси – Юстиция министрлигинде сакталат, үчүнчүсү такшалуучуга берилет.

32. Такшалуу аяктаган күндөн тартып бир айдын ичинде такшалуудан өтүүнүн жыйынтыктары боюнча корутундуну сунуштабагандар квалификациялык экзаменге киргизилбейт.

33. Мамлекеттик же жеке нотариус катары үч жылдан ашык иштеген адамдарга нотариалдык иш токтотулган учурдан тартып үч жылдан ашпаса такшалуудан өтүү мөөнөтү катары эсептелет.

34. Белгиленген графикке ылайык такшалуудан өтпөгөн адам, Квалификациялык комиссиянын чечими боюнча такшалууга кайрадан киргизилет.

Жеке нотариалдык ишти жүргүзүү

укугуна лицензия алууга талапкер адамдын

такшалуудан өткөрүү тартиби жөнүндө жобого

1–тиркеме

Такшалуудан өтүүчү адам жөнүндө

МААЛЫМАТТАР

№№	Такшалуудан өтүүчү адамдын аты–жөнү	Туулган жылы	ИЖН	Такшалуудан өтүүнүн негизи	Такшалуу башталган күн	Такшалуу аяктаган күнү	Эскертүү