Жети-Өгүздө юстиция үйү ачылат

Бүгүн, 2021-жылдын 6-августунда, Ысык-Көл облусунун Жети-Өгүз районунда Юстиция үйүнүн курулушуна капсулаларды салуу аземи болуп өттү. Курулушту 2021 -жылдын аягына чейин бүтүрүү пландалууда.

Юстиция үйүн түзүү юстиция органдары тарабынан калкка мамлекеттик тейлөө көрсөтүү координацияланышына мүмкүндүк берет. Юстиция үйлөрүндө мамлекеттик нотариалдык контора, калкка акысыз юридикалык жардам көрсөтүү боюнча борбор жана пробациянын аймактык органы жайгаштырылат.

Бул иш-чарага Кыргыз Республикасынын юстиция министринин орун басары Орозбек Садыков, Жети-Өгүз районунун акими Руслан Мейматкулов, юстиция жана пробация органдарынын аймактык башкармалыктарынын жетекчилери  жергиликтүү мамлекеттик органдардын өкүлдөрү катышышты.

Ушул сыяктуу Юстиция үйлөрү бүтүндөй Кыргызстан боюнча курулуп жатканын эскерте кетели.

Жалал-Абад облусунун Таш-Көмүр жана Ала-Бука шаарларында жайгашкан имараттардын курулушу бүгүнкү күнгө бүтүп, пайдаланууга берилди. 
Калган объекттерде (Талас облусунун Манас районунда, Ысык-Көл облусунун Жети-Өгүз районунда, Нарын облусунун Джумгал районунда жана Ош облусунун Кара-Суу шаарында) курулуш жүрүүдө жана 2021-жылдын аягына чейин аяктоо пландаштырылган.