Бишкекте өткөн тегерек столдо "Кыргыз Республикасынын адвокатурасы жана адвокаттык иш жөнүндө" мыйзамга өзгөртүүлөрдү киргизүү тууралуу мыйзам долбоору талкууланды

Ведомстволор аралык эксперттик топ "Кыргыз Республикасынын Адвокатурасы жана адвокаттык иш жөнүндө" Кыргыз Республикасынын Мыйзамына өзгөртүүлөрдү киргизүү тууралуу" Кыргыз Республикасынын Мыйзамынын долбоорун талкуулоо боюнча жумушчу кеңешме өткөрдү.

Иш-чарага мамлекеттик органдардын, эл аралык уюмдардын, Адвокатуранын жана жарандык коомдун өкүлдөрү катышты.

Юстиция министринин орун басары Орозбек Сыдыков бүгүнкү жумушчу жыйында бул мыйзамга өзгөртүү киргизүү боюнча түзөтүүлөр талкууланып жатканын айтты. Адвокаттардын өздөрү, өкмөттүк эмес уюмдардын жана эл аралык уюмдардын өкүлдөрү тарабынан айтылган сунуштар каралып, талкууланып жатат.

“Кыргыз Республикасынын Адвокатурасы жана адвокаттык иш жөнүндө» Кыргыз Республикасынын Мыйзамы адвокаттардын кызыкчылыктарына, жарандардын укуктары менен эркиндиктерине таасирин тийгизери, ошондой эле сот реформасынын максаттарына жетүүдө маанилүү роль ойной тургандыгы жалпыга белгилүү. Ошондуктан, түзөтүүлөрдү талкуулоодо жарандык сектордун жана адвокаттык коомчулуктун пикирин эске алуу маанилүү”, - деди министрдин орун басары.

Ал белгилегендей, бул жумушчу жолугушуу иш жүзүндө мыйзамдарда боштуктарды жана чыр-чатактарды кездештирген юристтер үчүн эң сонун мүмкүнчүлүк. Адвокаттардын мыйзам чыгаруу демилгеси жок экенин эске алып, бул жерде Кыргыз Республикасынын Юстиция министрлиги байланыштыруучу көпүрө катары иштейт. Катышуучулар тарабынан айтылган бардык сунуштар эске алынат. Андан ары бул сунуштарды эске алуу менен мыйзам долбоору коомдук талкууга коюлат, андан кийин Жогорку Кеңешке жөнөтүлөт.

Инвентаризациянын жүрүшү тууралуу өзүнчө сөз кылып жатып, Орозбек Сыдыков мыйзамдарды инвентаризациялоо процесси кызыкдар тараптардын кеңири катмарынын катышуусу менен ачык жүрүп жатканын айтты.

“Биз бардык каалоочуларды чакырабыз, эшик ачык. Эгерде жарандар кандайдыр бир себептерден улам тегерек үстөлдөргө катыша албаса, алар өз сунуштарын электрондук форматта жөнөтө алышат”, - деди ал.

Талкуунун жүрүшүндө катышуучулар мыйзамдарды жакшыртуу боюнча бир катар сунуштарды айтышты, ошондой эле башка мамлекеттердин тажрыйбасынан практикалык мисалдарды келтиришти.

Жумушчу жолугушуунун жыйынтыгын чыгарып, катышуучулар тажрыйбалык жактан натыйжалуу боло турган жана жарандардын кызыкчылыктарына жана муктаждыктарына жооп бере турган жакшы мыйзам базасын иштеп чыгуу жалпы милдет экенин белгилешти.

Жумушчу жолугушуу Кыргыз Республикасынын Юстиция министрлиги тарабынан Европа Биримдигинин “Кыргыз Республикасында мыйзам үстөмдүгү – 2-фаза” программасынын колдоосу менен уюштурулду.