КР юстиция министри жана омбудсмен соттолгон аялдарга юридикалык жардам көрсөтүү боюнча Юстиция министрлигинин пилоттук долбоорунун алкагында соттолгондор менен жолугушту

2022-жылдын 28-мартында Юстиция министри Аяз Баетов жана КР Омбудсмени Атыр Абдрахматова, министрдин орун басарлары Алмазбек Зарылбек уулу, Орозбек Сыдыков, МКЮЖ КБнын директору Акжол Калбеков жана ЖАКтын төрагасынын биринчи орун басары Кемел Садыков мамлекет кепилдеген юридикалык жардам системасынын адвокаттары менен бирге №2 айымдарды түзөтүү мекемесине соттолгондорго юридикалык жардам көрсөтүү боюнча пилоттук долбоордун алкагында барышты.

Жетекчилер камактагы аялдардын балдары менен жашоо шарттары менен таанышып, юридикалык жардам көрсөтүлүп жаткан соттолгон айымдар менен жолугушту

Министр мыйзамды коргоо калктын аялуу катмарынын укуктук жактан корголушунан башталаарын, аларга соттолгон аялдар да кирерин белгиледи.

Ал адвокаттарды жана жазык сот адилеттиги тутумунун бардык субъекттерин үй-бүлөлүк зомбулукка дуушар болуп, андан ары өзүн-өзү коргоого аракет кылганда укук бузууга аргасыз болгон аялдарга өзгөчө көңүл бурууга үндөдү.

“Юстиция министрлигинде да, Омбудсменде да, ЖАТта да, башка ведомстволордо да жазык процессинин ар бир субъекти өз функцияларын кандайча аткаргандыгын текшерүү үчүн функциялар, ресурстар жана мүмкүнчүлүктөр жок, ар бир орган өз багыты боюнча натыйжалуу иштеши керек. Эгерде мамлекет коомдун аялуу мүчөлөрүн коргой албаса, анда мыйзамдын үстөмдүгү жана мыйзамды коргоо маселеси күмөн жаратышы мүмкүн” – деп баса белгиледи.

Юстиция министрлигинин соттолгондорго консультациялык-укуктук жардам көрсөтүү боюнча пилоттук долбоору соттолгондордун укуктук корголуу деңгээлин жогорулатууга, аларды укуктук жактан агартууга жана жарандардын сот адилеттигине жетүүсүн камсыздоого, алардын мыйзамдуу укуктарын жана кызыкчылыктарын ишке ашырууга көмөк көрсөтүүгө багытталган.

Жалпысынан, соттолгондорго юридикалык жардам көрсөтүү боюнча пилоттук долбоор башталгандан бери 3 иш-чара өткөрүгөн. Адвокаттар 111 аялга юридикалык кеңеш беришти, алардын ичинен 61 соттолгон айымдан квалификациялуу юридикалык жардам көрсөтүү үчүн арыздар кабыл алынды, 1 соттолгон адам бошотулду, калгандары боюнча иш жүргүзүлүүдө.

Юстиция министрлиги №2 колониядагы соттолгон айымдарга консультациялык-укуктук жардам көрсөтүүнү улантат, ошондой эле башка колонияларга дагы баруу пландаштырылууда.