"Кыргыз Республикасында сот адилеттиги секторун колдоо: пробация жана сот адилеттиги системасын өркүндөтүү жана санариптештирүү (бардыгы үчүн сот адилеттиги)" (JUST4ALL) долбоордун жумушчу планы бекитилди

"Кыргыз Республикасында сот адилеттиги секторун колдоо: пробация жана сот адилеттиги системасын өркүндөтүү жана санариптештирүү (бардыгы үчүн сот адилеттиги)" (JUST4ALL) долбоордун жумушчу планы бекитилди. Программа 2022-жылдын январынан 2025-жылдын декабрына чейин төрт жылдын ичинде ишке ашырылат.

"Бардыгы үчүн сот адилеттиги" биргелешкен долбоору Кыргыз Республикасында жаза сот адилеттиги тутумун гумандаштырууга жана эл аралык стандарттарга жана ченемдерге, ошондой эле мыкты европалык практикага ылайык жаза сот адилеттиги чөйрөсүндө реформаларды жүргүзүүдө өлкөнүн потенциалын жогорулатууга багытталган.

Бул долбоордун бет ачарында юстиция министри Аяз Баетов, министрдин орун басары Алмаз Зарылбек уулу, Кыргыз Республикасынын Башкы прокурорунун орун басары Т.Ишеналиева, Европа Биримдигинин Кыргыз Республикасындагы Өкүлчүлүгүнүн Элчиси Эдуард Ауэр, БУУнун Баңгизаттар жана кылмыштуулук боюнча Борбордук Азия башкармалыгынын аймактык кеңсесинин туруктуу өкүлү Ашита Миттала катышышты.

Долбоордун алкагында реформанын эки маанилүү багыты каралат: пробация жана жаза сот адилеттиги жаатындагы маалыматтарды башкаруу. Ошентип, пробациянын кардарларын реабилитациялоону камсыз кылган жана сот адилеттиги секторун автоматташтыруу жана санариптештирүү контекстинде гендердик маселелерди жана адам укуктарын эске алуу менен сот адилеттигин жүзөгө ашырууга көмөк көрсөтүүчү функционалдык пробация кызматы түзүлөт.

Мындан тышкары, долбоор укуктук базаны өркүндөтүү, маалыматтарды башкаруунун жаңы системасын иштеп чыгуу жана киргизүү, ошондой эле пробация кызматына реабилитациялоонун жекече пландарын ишке ашырууга мүмкүндүк берүүчү инструменттер менен чараларды иштеп чыгуу жана ишке киргизүү аркылуу пробация кызматынын институционалдык потенциалын бекемдөөгө багытталган, бул пробация кызматынын натыйжалуулугун жогорулатууга алып келет.