Кыргыз Республикасынын Президенти Садыр Жапаров “Кыргыз Республикасынын ченемдик укуктук актылары жөнүндө” Кыргыз Республикасынын Мыйзамына өзгөртүүлөрдү киргизүү тууралуу” Кыргыз Республикасынын Мыйзамына кол койду.
 
Мыйзам 2025-жылдын 6-февралында Кыргыз Республикасынын Жогорку Кеңеши тарабынан кабыл алынган.
 
Мыйзамга ылайык бардык ченемдик укуктук актылардын долбоорлору Кыргыз Республикасынын Министрлер Кабинетинин Ченемдик укуктук актылардын долбоорлорун коомдук талкуулоонун бирдиктүү порталында жайгаштырылууга тийиш.
 
Мыйзамда коомдук талкуулоонун мөөнөтү 15 календардык күнгө чейин кыскартылды, ал эми коомдук талкуулоонун натыйжалуулугун жогорулатууга багытталган кошумча иш-чаралар уюштурулган учурда коомдук талкуулоонун мөөнөтү 10 календардык күнгө чейин кыскартылышы мүмкүн.
 
Мындан тышкары, Мыйзамга ылайык коомдук талкуулоо төмөнкүдөй ченемдик укуктук актылардын долбоорлоруна талап кылынбайт:
 
– Конституциялык соттун чечиминен келип чыгуучу;
– редакциялык-техникалык мүнөздөгү өзгөртүүлөрдү киргизүү каралган;
 
– коргонууну жана улуттук коопсуздукту камсыз кылуу, мамлекеттик сырларды сактоо, аскердик-техникалык кызматташтык жаатындагы коомдук мамилелерди жөнгө салуучу;
 
– убактылуу мүнөзгө ээ, колдонуу мөөнөтү бир жылдан аз болгон, баалардын туруктуулугуна жетишүүгө жана аны колдоого, акча-кредит саясатын ишке ашырууга, банк жана төлөм системаларынын натыйжалуулугун, коопсуздугун жана ишенимдүүлүгүн камсыз кылууга багытталган;
 
– Кыргыз Республикасынын Президенти жана Кыргыз Республикасынын Министрлер Кабинетинин Төрагасы тарабынан кечиктирилгис катары аныкталган, аларды кезексиз тартипте кароо үчүн Кыргыз Республикасынын Президентинин жана Кыргыз Республикасынын Министрлер Кабинетинин Төрагасынын демилгеси боюнча Кыргыз Республикасынын Жогорку Кеңешине киргизилүүчү;
 
– ал жеткис жагдайлардын шарттарында жарандардын жана юридикалык жактардын укуктарын жөнгө салууга багытталган.
 
Ошондой эле, Мыйзамга ылайык жөнгө салуучу таасирди талдоо төмөнкүдөй учурларда жүргүзүлбөйт:
- ал жеткис жагдайлардын шарттарында ишкердик иш-аракетти жөнгө салууда;
 
- колдонуу мөөнөтү бир жылдан аз болгон, баалардын туруктуулугуна жетишүүгө жана аны колдоого, акча-кредит саясатын ишке ашырууга, банк жана төлөм системаларынын натыйжалуулугун, коопсуздугун жана ишенимдүүлүгүн камсыз кылууга багытталган убактылуу ченемдик укуктук актыларды даярдоодо.
 
Ушуну менен бирге, Мыйзамга ылайык жаңы коомдук мамилелердин иштешин апробациялоо максатында Кыргыз Республикасынын Президенти бир жылга чейинки мөөнөткө коомдук мамилелерди убактылуу жөнгө салууну киргизүүгө укуктуу.