Бишкекте Кыргыз Республикасынын Юстиция министрлигинин алдындагы Соттук экспертизалардын мамлекеттик борборунун жаӊы имаратын реконструкциялоого арналган, капсула салуу аземи болуп өттү

Бүгүн 2016-жылдын 10-мартында Бишкекте Кыргыз Республикасынын Юстиция министрлигинин алдындагы Соттук экспертизалардын мамлекеттик борборунун (СЭМБ) жаӊы имаратын реконструкциялоого арналган, капсуланы салуу аземи болуп өттү. Иш чарага Кыргыз Республикасынын Юстиция министри Жылдыз Мамбеталиева, Кыргыз Республикасында АКШнын иштерине ишеним берилген убактылуу өкүл Алан Мельцер, Борбордук Азиядагы баӊгизат жана кылмыштуулук боюнча БУУ башкармалыгынын регионалдык өкүлү Ашита Миталл айым, Кыргыз Республикасындагы эл аралык уюмдардын жана дипломатиялык миссиялардын, министрликтердин жана ведомстволордун, жалпыга маалымдоо каражаттарынын өкүлдөрү катышышты.

Аземдин катышуучулары менен саламдашкан соӊ, Кыргыз Республикасынын Юстиция министри Жылдыз Мамбеталиева, толук курулуп бүтө элек объект менен кошо аянты 0,3 гектар жер участогу Кыргыз Республикасынын Юстиция министрлигинин алдындагы Соттук экспертизалардын мамлекеттик борборунун балансына 2010-жылдын июлунда эле берилгендигин билдирди. Бирок андан бери каржылоонун жоктугунан курулуш бүткөрүлгөн эмес. Курулуш иштерин жүргүзүү «Соттук экспертизалардын мамлекеттик борборунун потенциалын бекемдөө» баӊгизат жана кылмыштуулук боюнча БУУ башкармалыгынын долбоорунун алкагында мүмкүн болду.

48 миллион сом  суммасына бул объектти реконструкциялоо боюнча иштер, Укук коргоо иши жана баӊгизат каражаттарын эл аралык жүгүртүү менен  күрөшүү боюнча АКШнын Мамлекеттик департаментинин бюросунун финансылык колдоосунда  баӊгизат жана кылмыштуулук боюнча БУУ башкармалыгы тарабынан жүзөгө ашырылат. Жаӊы имаратты 2016-жылдын ноябрында пайдаланууга берүү пландалууда. Ошол эле мезгилде Юстиция министрлигинин башчысы, бул имаратты реконструкциялоо Кыргыз Республикасынын Юстиция министрлигинин алдындагы Соттук экспертизалардын мамлекеттик борборун өнүктүрүүгө карата жасалган биринчи гана кадам экендигин белгиледи.

«Бүгүнкү күндө биз үчүн эӊ эле артыкчылыктуу болуп Соттук экспертизалардын мамлекеттик борборун, ал эми андан ары,  жүргүзүлгөн экспертизалардын сапатын жогорулатуу жана эксперттердин корутундуларына эл аралык таанууну алуу үчүн эл аралык стандарттар менен ылайык башка соттук-эксперттик уюмдарды аккредитациялоого даярдоо саналат. Бул үчүн СЭМБнын бардык инфраструктурасын эл аралык стандарттардын талаптарына ылайык аккредитациялоого  даярдоо зарыл. Ушуга байланыштуу биздин алдыбызда СЭМБни зарыл болгон жабдуулар жана криминалистикалык техникалар менен камсыздоо боюнча милдет турат, анткени азыркы прибордук база моралдык жактан эскирген жана алмаштырууну талап кылат! Мындан тышкары эксперттик кадрлардын квалификациясын көтөрүү, соттук экспертизаны илимий-методикалык камсыздоо салттуу соттук экспертизаларды өткөрүүдө да, ошондой эле жаӊы түрлөрүн өндүрүүнү, атап айтканда ДНК экспертизасын, эколгоиялык жана товар таануу экспертизаларын уюштурууда да  СЭМБнин мүмкүнчүлүктөрүн кеӊейтет» - деп белгиледи Жылдыз Мамбеталиева.

Өз кезегинде Борбордук Азиядагы баӊгизат жана кылмыштуулук боюнча БУУ башкармалыгынын регионалдык өкүлү Ашита Миталл айым, акыркы эки жылдан бери баӊгизат жана кылмыштуулук боюнча БУУ башкармалыгы Кыргызстанда соттук-медициналык эксперттердин квалификациясын көтөрүү жана аларды даярдоо боюнча көмөк көрсөтүп жаткандыгын белгиледи. Кыргыз Республикасынын Юстиция министрлигинин алдындагы СЭМБ инфраструктурасын жаӊылоо жогорку сапаттагы экспертизаны түзүүдөгү жана келечекте СЭМБнин соттук-эксперттик ишине эл аралык аккредитацияны алуу үчүн Кыргызстанга көмөк көрсөтүүдөгү биздин жалпы аракеттерибиздин кезектеги кадамы болуп саналат», - деп жыйынтыктады Ашита Миталл айым.

Аземдин катышуучуларынын саламдашуу сөздөрүнөн кийин, жаӊы объектти реконструкциялоого арналган,  капсуланы салуу салтанаттуу аземин өткөрүштү. Андан кийин имарат боюнча таанышуу экскурсиясы уюштурулган.

Маалымат үчүн:  Кыргыз Республикасынын Юстиция министрлигинин алдындагы Соттук экспертизалардын мамлекеттик борбору Кыргыз Республикасынын негизги соттук-эксперттик мекемеси болуп саналат жана өлкөдөгү соттук эксперттик изилдөөлөрдүн 80 % ашыгын аткарат. Бүгүнкү күндө СЭМБ аянты 441 чарчы метр 1940-жылы салынган имаратта жайгашкан. Кызматкерлердин штаттык саны 128 бирдикти түзөт. СЭМБ эксперттери менен жылына экспертизанын 48 түрү боюнча изилдөөлөр жүргүзүлөт. 2015-жылы мамлекеттик борбор тарабынан 6793 экспертиза өткөрүлгөн, анын ичинде татаал жана көп объекттүү экспертизалар да  бар.