Юстиция министринин ЕБ «Кыргыз Республикасында укуктун үстөмдүгүн бекемдөөгө көмөктөшүү» долбоорунун башчысы жана GIZ дин өкүлдөрү менен жолугушуусу болду

Бүгүн 2014-жылдын 9-октябрында Кыргыз Республикасынын Юстиция министрлигинин Улуттук залында Европа Биримдигинин «Кыргыз Республикасында укуктун үстөмдүгүн бекемдөөгө көмөктөшүү» долбоорунун алкагындагы каржы келишими боюнча жумушчу жолугушуу болду. Иш чарага Кыргыз Республикасынын Юстиция министри А.Шыкмаматов, «Кыргыз Республикасында укуктун үстөмдүгүн бекемдөөгө көмөктөшүү» долбоорунун башчысы Стефанос Кареклас мырза жана эл аралык кызматташуу боюнча Германиялык коомдун өкүлдөрү катышышты. Бул жолугушуунун негизги максаты ченемдик укуктук актылардын долбоорлорун талкуулоо жана иштеп чыгуу боюнча маек аянтчасын түзүүгө байланышкан маселелерди талкуулоо болду. Юстиция министри А.Шыкмаматовдун пикири боюнча бул сөзсүз түрдө кабыл алынган мыйзамдардын жана мыйзам алдындагы актылардын сапатын жакшыртат, ошондой эле юридикалык кызматтардын, министрликтердин жана ведомстволордун кызматкерлерин окутууга түрткү болот. Мындан сырткары министр А.Шыкмаматов мамлекеттеги кандай болбосун реформалар анын укутук тутумун өркүндөтүү менен коштолот. Ушуга байланыштуу, сапаттуу ченемдик укуктук актыларды кабыл алуу, укуктук жана демократиялык мамлекетти куруу максатында өлкөдө жүргүзүлүп жаткан реформанын түзүүчү курамчасы болуп саналат. «Анткени мыйзамдардагы коллизиялар жана боштуктар укук колдонуу органдары үчүн укуктук «жылчыкты»  жаратат», - деп белгиледи министр. Юстиция министри А.Шыкмаматовдун айтуусу боюнча, күтүлгөн жыйынтыкка жетишүү үчүн долбоордун катышуучулары бардык күчүн жумшоосу зарыл. Өз кезегинде долбоордун башчысы Стефан Кареклас мырза, бул жолугушууга жеке катышып бергендиги үчүн министрге ыраазычылык айтты жана юрист катары маектешүү аянтчасын жаратуу маанилүүлүүгүн түшүнөөрүн белгиледи. Министр А.Шыкмаматов Европа биримдигинин  Кыргыз Республикасынын укуктук жана демократиялык мамлекет катары өнүгүүсүнө кошкон салымын жогору баалады. Эске салсак, өткөн жылдын сентябрында Кыргыз Республикасы жана Европа Биримдигинин ортосунда «Айкындуулукка жана отчеттуулукка өзгөчө басым менен Кыргыз Республикасында укуктун үстөмдүгүн илгерилетүү» долбоору боюнча каржы келишимине кол коюлган. Бул келишимдин алкагында мүмкүнчүлүктүү коррупциялык чөйрөнүн өнүгүүсү үчүн шарт түзүп берген коррупциялык ченемдерди, боштуктарды жана коллизияларды жоюуу жолу менен мыйзамдардын сапатын жогорулатуу болжолдонууда. Сот тутумунун ишмердүүлүгүн жакшыртуу максатында ишти башкаруунун электрондук тутумун киргизүү пландалууда. Долбоорду ишке ашырууга бир катар мамлекеттик органдар тартылган, атап айтканда Кыргыз Республикасынын Жогорку Кеӊеши, Кыргыз Республикасынын Башкы прокуратурасы, Кыргыз Республикасынын Акыйкатчысы (Омбудсмен), Кыргыз Республикасынын Эсептөө палатасы жана сот бийлигинин органдары, ошондой эле адвокатура институту. Муну менен Кыргыз Республикасынын Юстиция министрлиги бул долбоордун негизги бенефициары болуп саналаарын белгилеп кетүү керек.
Мөөрү

2014.10.09 16:28:50