“Укугуңду бил” акциясында КРнын юстиция министрлигинин юристтерине 2388 жаран кайрылды

2016-жылдын, 12-13-14-октябрлары жана 17-октябрдан 20-октябрга чейин, республика боюнча “Укугуңду бил” ураанынын астында, калктын укуктук сабаттуулугун жогорулатуу менен жарандардын укугун коргоого арналган акция болуп өттү. Иш чара, Кыргыз Республикасынын юстиция министрлигинин демилгеси менен, Европа Биримдиги тарабынан каржыланган “Кыргыз Республикасында мыйзам үстөмдүгүн бекемдөөгө көмөктөшүү” долбоорунун алкагында уюштурулду.

Акция, 12-октябрда, Ош жана Кара Суу шаарларында, КРнын юстиция министри Жылдыз Мамбеталиева, “Кыргыз Республикасында мыйзам үстөмдүгүн бекемдөөгө көмөктөшүү” долбоорунун жетекчиси Стефанос Карекластын катышуусунда старт алды.

“Укугуңду бил” акциясы өз ишин Жалал Абад областында( 13-октябрь), Баткен областында (14-октябрь), Талас областында (17-октябрь), Нарын областында (18-октябрь), Ысык Көл областында (19-октябрда)улап, 20-октябрда Бишкек шаарында жыйынтыкталды.

Иш чаранын негизги максаты, калктын укуктук сабаттуулугун жогорулатуу, жарандардын сапаттуу юридикалык кеңеш алуусун уюштуруу, укугун коргоо жана жергиликтүү өзүн өзү башкаруу органдары менен катардагы атуулдардын кызматташуусуна шарт түзүп, бири бирине ишенимин арттыруу.

Иш чара максаттуу жана жыйынтыктуу болуусу үчүн, юстиция министрлигинин демилгеси менен, юристтер менен нотариустардан тышкары, Мамлекеттик каттоо кызматынын, жарандыкты жана нике каттоо кызматынын адистери дагы тартылды. Кайрылгандар, паспорт, виза алуу, кыймылсыз мүлктөрдү каттоо боюнча суроолорго жооп ала алышты. Юстиция министрлиги “Укугуңду бил” акциясына кайрылган жарандардын кайрылуулары боюнча жыйынтык чыгарды:

-         Жер аймактарын жана турак жайларды каттоо боюнча кеңеш сурап 692 жаран кайрылды.

Атуулдар жер аймагын кандай шарттарда ала алаарын, бар жерин кантип каттоодон өткөрсө болоору тууралуу, жер талашты чечүү жол жоболору, жер алууда алданып калуудан кантип сактануу керектиги тууралуу кеңеш сурашкан;

-         Үй бүлөлүк талаш тартыш меселелердин чечилиши боюнча 375 адам кайрылган.

Жарандар (көпчүлүгү айымдар) ажырашууда талашты кантип чечүү керектиги тууралуу кызыгышты. Өзгөчө никеге туруп коюп эле, расмий катталбаган учурлар арбын экендиги аныкталды. 199 адам алимент кестирип алуу боюнча кеңеш алышты;

-         Насыя алуу жана андан кутулуу боюнча 262 адам кайрылган;

-         Мурастыгын бекемдөө жана бул багыттагы чыр чечүү боюнча кеңеш алуу үчүн 254 жаран кайрылды;

Юристтер мурскерлигин каттоо боюнча, убагында катталбагандагы кесепеттер жана мурас калтырылбаса кандай кадамдарга барыш кереги тууралуу суроолорго жооп ала алышты;

-          Ар кыл документтерди каттоо (паспорт, төрөлгөндүгү тууралуу күбөлүк, каза болгондугу тууралуу күбөлүк ж.б.у.с) боюнча кеңеш сурап, 231 жаран кайрылды;

-         Кайрылгандардын 210у эмгек чырларын чечүү боюнча суроолоруна жооп алууга келишкен.

 Бул жумушка орношууда, мыйзамсыз иштен кетирилген жана убагында айлык акы төлөнбөгөн учурларды камтыган суроолор.

-         Сот жана укук коргоо органдарына доо арыз менен кайрылуу жолдорун сурап 186 адам кайрылды;

Белгилей кетүүчү жагдай, кайрылуулардын көпчүлүгү укуктук негизи жок болгондугу. Мисалы, жарандарыбызды балдарды бала бакчага орноштуруу, бала бакча, мектеп, медициналык мекемелердин курулуштары, инфраструктураны оңдоо, медицианлык жардам алуу сыяктуу суроолор кызыктырат. Темадан сырт кайрылгандардын саны 162ге жетти.

Юстиция министрлигинин юристтери мүмкүнчүлүккө жараша ар бир жаранга сапаттуу жана орундуу кеңеш берүүгө далалаттанышты.

Жалпысынан “Укугуңду бил!” акциясынын экинчи фазасында Кыргыз Республикасы боюнча 2 388 адам юридикалык кеңеш алышты. Мамлекеттик органдардын элге бирдиктүү кызмат кылуусу калкка , алардын конституциялык укугун коргоодо жана сапаттуу юридикалык алуусуна шарт түзүүсүндө жеңилдик берет деген үмүт зор.

Кыргыз Республикасынын юстиция министрлигинин демилгеси менен, Европа Биримдиги тарабынан каржыланган “Кыргыз Республикасында мыйзам үстөмдүгүн бекемдөөгө көмөктөшүү” долбоорунун алкагында уюштурулган  “Укугуңду бил” акциясы биринчи жолу,  2016-жылдын 22-23-июлдарында уюштурулуп, эки күндө 1700адамга консултациялык жардам берилген.