Бишкекте өткөн тегерек үстөлдө “Ишкердик субъекттерине текшерүү жүргүзүүнүн тартиби жөнүндө” мыйзамды өркүндөтүү маселеси каралды

Бүгүн, 2021-жылдын 24-ноябрында, Кыргыз Республикасынын мыйзамдарын инвентаризациялоо боюнча жүргүзүлүп жаткан иштердин алкагында "Кыргызстанда бизнести кантип текшерүү керек" аттуу тегерек үстөл болуп өттү, анда “Ишкердик субъекттерге текшерүү жүргүзүүнүн тартиби жөнүндө” Кыргыз Республикасынын Мыйзамынын долбоору талкууланды.

Кыргыз Республикасынын Экономика жана коммерция министрлиги жана Улуу Британия Өкмөтү тарабынан каржыланган Саясий инновацияларды колдоо программасы (PIF) тарабынан уюштурулган иш-чарага мамлекеттик органдардын, эл аралык уюмдардын, ишкердик субъекттеринин жана массалык маалымат каражаттарынын өкүлдөрү катышты.

Инновациялык саясатты колдоо программасынын жетекчиси Ольга Колдасова бул жолугушуу бардык кызыкдар тараптар үчүн көйгөйлүү маселелерди талкуулоо жана мыйзам базасын өркүндөтүү боюнча өз сунуштарын айтуу үчүн эң сонун мүмкүнчүлүк экенин айтты.

КР Экономика жана коммерция министрлигинин жөнгө салуучу таасирин талдоону иштеп чыгуу бөлүмүнүн башчысы Искендер Нурбеков “Ишкердик субъекттерине текшерүүлөрдү жүргүзүүнүн тартиби жөнүндө” КР Мыйзамынын долбоорун иштеп чыгуу менен ведомстволор аралык жумушчу топ алектенгенин билдирди.

Анын айтымында, мыйзам долбоорунда мамлекеттик көзөмөлдөөчү органдар тарабынан Пландык текшерүүлөрдү биргелешкен тартипте жүргүзүү; Мамлекеттик көзөмөл органдарынын ишин баалоону ишке ашыруу; Мамлекеттик көзөмөл органдары тарабынан калкка жана айлана-чөйрөгө зыян келтирбөөгө багытталган атайын алдын алуу иш-чаралардын механизмин ишке ашыруу каралган.

PIF программасынын эл аралык консультанты Гидриус Кадзиаускас ишкердик субъекттерин текшерүүнүн эл аралык тажрыйбасы менен тааныштырып, ошондой эле Кыргызстанда колдонулушу мүмкүн болгон чаралар жана механизмдер тууралуу айтып берди.

PIF программасынын консультанты Гүлнара Ускенбаева катышуучуларга «Ишкердик субъекттерин текшерүүлөр жөнүндө» Кыргыз Республикасынын Мыйзам долбоорунун Концепциясы менен тааныштырды. Анын айтымында, мыйзам долбоорунда ишкерлер иш жүзүндө туш болгон тобокелдиктер эске алынган.

Талкууда айрым катышуучулар мыйзамдарда текшерүү жана көзөмөлдөө боюнча ченемдер бар экенин, ал эми ишкерлердин көмүскөдөн чыгуусуна, мыйзамдуу ишмердүүлүгүн жүргүзүүгө көмөктөшүүчү ченемдер жок экенин белгилеп, мындай механизмдерди эске алууну сунушташты.

Тегерек үстөлдүн экинчи бөлүгүндө PIF программасынын консультанттары иш-чаранын катышуучуларына Кыргыз Республикасындагы текшерүүлөрдүн натыйжалуулугунун көрсөткүчтөрүн жана Кыргыз Республикасынын мыйзамдарын инвентаризациялоонун алкагында Мыйзамды баалоонун негизги жоболорун көрсөтүштү.

Талкуунун жүрүшүндө катышуучулар мыйзамдарды өркүндөтүү боюнча сунуштарды айтып, башка мамлекеттердин тажрыйбасынан практикалык мисалдарды келтиришти.

Жумушчу жолугушуунун жыйынтыгын чыгарып, катышуучулар иш жүзүндө натыйжалуу жана жарандардын, ишкерлердин жана текшерүүчү органдардын кызыкчылыктарына жооп бере турган жакшы мыйзамдык базаны иштеп чыгуу жалпы милдет экендигин белгилешти.