Эл үчүн жеткиликтүү мыйзамдар: “Коом талкуу системасына катышуучулардын өз ара байланышта иштөөсүнүн натыйжалуулугун жогорулатуу” деген темада тегерек үстөл

“Коом талкуу системасына катышуучулардын өз ара байланышта  иштөөсүнүн натыйжалуулугун жогорулатуу” деген темада тегерек үстөл болуп өттү.  Бул иш-чара Кыргызстандын юридикалык клиникалары ассоциациясы тарабынан Кыргыз Республикасынын Юстиция министрлиги менен кызматташтыкта уюштурулду. 

Тегерек үстөлдүн негизги максаты - кабыл алынуучу мыйзам долбоорлорунун сапатын жакшыртуу боюнча маалымат алмашуу жана аларды талкуулоо процессине жарандарды тартуу болду.

Тегерек үстөлдү КР Юстиция министрлигинин Ченемдик укуктук актылардын долбоорлорун экспертизалоо бөлүмүнүн начальниги Сайра Ызакова “Ченемдик укуктук актылардын долбоорлорун коомдук талкуулоонун бирдиктүү порталы – аны түзүүнүн шарттары, укуктук негизи, иштин натыйжалары” деген темадагы перезентация менен ачты. Ал өзүнүн  сөзүндө Порталдын жылдын жыйынтыгындагы натыйжалары жөнүндө жана мыйзам долбоорлорунун демилгечилери туш болуп жаткан татаалдыктар тууралуу айтып берди.  «Биз бул порталды мамлекеттик органдардан кандай демилгелер болуп жатканын элибиз көрүп турушу үчүн жана жарандарга бул демилгелерге өз мамилесин билдирүү, кабыл алынуучу мыйзам долбоорлорун коомдук талкуулоо стадиясында өз пикирин, позициясын билдирүүгө мүмкүнчүлүк бериш үчүн түздүк», - деп белгиледи, Сайра Ызакова.

Тегерек үстөлдүн жүрүшүндө айтылган негизги көйгөйлөрдүн бири – мыйзам долбоорлорун иштеп чыгууда жана кабыл алууда айрым мамлекеттик органдардын аларды коомдук талкуулоо стадиясын этибар албагандыгы, ошондой эле калк арасында мамлекеттик орган үчүн комментарийде өз пикирин кантип туура билдирүү керектиги боюнча билимдин жоктугу жөнүндө болду.

“Мамлекеттик органдар жарандарга маалымат берүү жана алар менен кызматташуу үчүн онлайн платформаларды түзө башташты. Азыр биздин алдыбызда дагы бир милдет турат – бул жарандардын активдүүлүгүн жогорулатуу, аларга маалымат алып эле тим болбостон, өз оюн да айта ала турган мына ушундай сайттар бар экенин калкка маалымдоо. Мыйзамдар эл үчүн, жашообузду жакшыртуу үчүн кабыл алынып жатканын түшүндүрүү керек. Азыр Кыргызстандын юридикалык клиникаларынын ассоциациясы “Эл үчүн жеткиликтүү мыйзамдар” долбоорунун алкагында ченемдик укуктук актыларды анализдөө жана экспертизалоо боюнча акысыз онлайн-окутуу жүргүзүп жатат. Бул курста жарандарды ченем жаратуу техникасына жана ЧУА долбоорлорун коомдук талкуулоонун бирдиктүү порталын туура пайдаланууга окутабыз. Бүгүнкү күндө Кыргызстан боюнча 300дөн ашык жаран окутулду, курстун бүтүрүүчүлөрү кабыл алынуучу мыйзам долбоорлоруна анализ жасашат жана демилгечилер үчүн өздөрүнүн комментарийлерин калтырышат. Башкача айтканда, биз жарандарга бул ишти кандайча туура жасашты үйрөтүп жатабыз,” - деди Кыргызстандын юридикалык клиникаларынын ассоциациясынын президенти Артур Бакиров.

Пикирлер ар түрдүү болгонуна карабастан, бардык катышуучулар Ченемдик укуктук актылардын долбоорлорун коомдук талкуулоонун бирдиктүү порталы зарыл жана ал жарандык коомдун уюмдарына да, ЖМК өкүлдөрүнө да кабыл алынуучу мыйзам долбоорлору жөнүндө өз убагында маалымат алууга мүмкүнчүлүк түзөт деген пикирге келишти.

Талкууга КР Жогорку Кеңешинин Аппаратынын, КР Юстиция министрлигинин, КР Экономика жана коммерция министрлигинин, КР Финансы министрлигинин, КР Билим берүү жана илим министрлигинин, КР Маданият, маалымат, спорт жана жаштар саясаты министрлигинин, КР Айыл, суу чарба жана региондорду
өнүктүрүү министрлигинин,  КР Эмгек, социалдык камсыздоо жана миграция министрлигинин, КР Ички иштер министрлигинин өкүлдөрү, жарандык коомдун уюмдарынын, юристтер жамаатынын жана эл аралык уюмдардын өкүлдөрү катышышты.

Талкуунун аягында эксперттер мамлекеттик органдар менен жарандардын өз ара байланышта иштешүүсүн жакшыртуу, ошондой эле мыйзам долбоорлорун коомдук талкуулоо процессине жеткиликтүүлүктү жогорулатуу боюнча өз сунуштарын беришти.

Бул иш-чара USAID’дин “Жигердуу жарандар” долбоорунун алкагында “Эл үчүн жеткиликтүү мыйзамдар” демилгесин ишке ашырууда Кыргызстандын юридикалык клиникаларынын ассоциациясы тарабынан өткөрүлдү.