Юстиция министрлиги 138 мыйзамды күчүн жоготту деп эсептөөнү (колдонууну токтотууну) сунуштаган мыйзам долбоорун иштеп чыкты

Юстиция министрлиги 138 мыйзамды күчүн жоготту деп эсептөөнү (колдонууну токтотууну) сунуштаган мыйзам долбоорун иштеп чыкты. Бул мыйзам долбоору Кыргыз Республикасынын мыйзамдарын инвентаризациялоонун алкагында даярдалган.

Аталган 138 мыйзам актуалдуу болбой калган жана төмөнкүдөй негиздер боюнча аларды колдонууну токтотуу сунушталат.

1. Колдонуудагы мыйзмдарга киргизилген өзгөртүүлөр (толуктоолор, оңдоолор) өзүнчө мыйзамдар менен таризделет жана “өзгөртүүлөрдү киргизүү жөнүндө мыйзам” деп аталышат. Мыйзам күчүн жоготту деп эсептелген учурда ошол негизги мыйзамга өзгөртүүлөрдү киргизген мыйзамдарды да күчүн жоготууга чыгарыш керек. Бирок негизги мыйзам күчүн жоготуп, бирок ага өзгөртүүлөрдү киргизген мыйзамдар күчүн жоготууга чыгарылбай кала берген учурлар бар.

Ошого байланыштуу Юстиция министрлиги мыйзамдарга инвентаризация жасап, негизги мыйзамдарга киргизилген оңдоолор болуп эсептелген мыйзамдарды аныктады. Ал эми “негизги мыйзамдар” болсо мурда эле колдонулбай калган, ошондуктан аларга оңдоо киргизген мыйзамдарды да күчүн жоготууга чыгарыш керек.

2. Күчүн жоготууга сунушталып жаткан мыйзамдардын дагы бир тобу – жөнгө салуучу предмети тармактык башка мыйзамдар менен жөнгө салынып жаткан мыйзамдар.

Мисалы, “Нооруз” элдик майрам күнүн белгилөө жөнүндө” Мыйзамды күчүн жоготту деп эсептөө сунушталып жатат, бул Мыйзам 1991-жылы кабыл алынган жана аны менен 21-март Нооруз элдик майрам күнү деп жарыяланган. Ошону менен бирге эле, Кыргыз Республикасынын Эмгек кодексинин 113-статьясына ылайык Кыргыз Республикасында жумуш эмес майрам күндөрү болуп төмөнкүлөр саналат:

1-январь - Жаңы жыл;

23-февраль - Ата-Журтту коргоонун күнү;

8-март - Аялдардын эл аралык күнү;

21-март - Элдик Нооруз майрамы;

7-апрель - Элдик Апрель революциясы күнү;

1-май - Эмгек майрамы;

5-май - Кыргыз Республикасынын Конституциясынын күнү;

9-май - Жеңиш күнү;

31-август - Кыргыз Республикасынын Көз карандысыздыгынын күнү;

7 жана 8-ноябрь - Тарых жана ата-бабаларды эскерүү күндөрү.

Башкача айтканда, бул маселе эмгек мыйзамы менен жөнгө салынып жаткандыктан “Нооруз” элдик майрам күнүн белгилөө жөнүндө” Мыйзамды күчүн жоготту деп эсептөө сунушталып жатат. Бул мыйзам күчүн жоготуп, колдонулбай калганда деле Нооруз элдик майрам болуп кала берет.