Адвокаттык жана жеке нотариалдык лицензияларды алуу үчүн алдыда боло турган сынактарда колдонула турган тесттик суроолордун жана жооптордун долбоору

Бул суроолордун жана жооптордун тизмеси, долбоор катары, башкача айтканда, АЛАР АКЫРКЫ ЭМЕС жана алдыда боло турган сынактарда колдонуу үчүн сунушталат. Суроолордун жана жооптордун долбоорун коомчулук үчүн ачык Юстиция министрлигинин расмий сайтына жайгаштырып, жарыялоонун максаты - коомчулуктун кеңири талкуусуна шарт түзүү жана тиешелүү сын-пикирлерди чогултуу. Сын-пикирлерди жана сунуштарды minjust.gra@gmail.com дарегине 2023-жылдын 5-февралына чейин жөнөтсөңүздөр болот.

Тесттик суроолордун жана жооптордун долбоору көз карандысыз эксперттер тарабынан иштелип чыккан жана андан ары Сиздерден келип түшкөн сын-пикир жана сунуштардын  негизинде толукталып иштелип чыгат.

Учурда эл аралык уюмдардын өкүлдөрү болгон, көз карандысыз эксперттердин жардамы менен, 2500-3000ге чейин тесттик суроолордун/жооптордун тизмесин түзүү боюнча иштер жүрүп жатат. Бул долбоор  Европа Биримдигинин Кыргыз Республикасында Мыйзам үстөмдүгү программасынын алкагында ишке ашырылууда.

Берилген тизменин кээ бирлери адвокаттык иш жүргүзүүгө лицензия алуу үчүн сынак процедуралары үчүн пайдаланылышы мүмкүн, ал эми кээ бирлери нотариалдык иш жүргүзүүгө лицензия алуу үчүн пайдаланылышы мүмкүн (суроолордун бир бөлүгү ушул жылдын январь айында да толукталып иштелип чыгат, анын ичинде нотариалдык иш жөнүндө Мыйзамдар боюнча дагы).
Суроолор менен кийинки шилтеме аркылуу таанышса болот: http://minjust.gov.kg/ru/content/1125.

Суроонун тарыхы:

2022-жылдын 4-кварталында Кыргыз Республикасынын Юстиция министрлиги сынактардын жол-жоболорунун эффективдүүлүгүн жогорулатуу жана субъективдүү факторлорду минималдаштыруу максатында, адвокаттын жана жеке нотариустун лицензиясын алуу үчүн, өткөрүлүүчү сынактардын форматын түп-тамырынан бери реформалай тургандыгын расмий жарыялаган.

Мисалы, жеке нотариустун лицензиясын алуу үчүн, өткөрүлүүчү сынак мындан ары, 1 гана тестирлөө этабынан турат, аңгемелешүү жана практикалык тапшырмалар алынып салынат (мурда булар өзүнчө 2-жана 3-этаптардан туруп, акыркы жыйынтыктарга олуттуу таасирин тийгизген).

Сынак форматындагы негизги өзгөртүүлөр:

Сынактын субъективдүү этаптары алынып салынат жана объективдүү компьютердик тестирлөөгө басым жасалат (жеке нотариустун лицензиясы боюнча сынакка тиешелүү);

Сынактын суроолору мазмундуу жаңыртылып, 3000 суроого чейин көбөйтүлөт, суроолордун тизмеси гана эмес, бардык жооптордун тизмеси да Юстиция министрлигинин расмий сайтында коомчулукка жеткиликтүү болушу үчүн жайгаштырыла (коррупциялык тобокелчиликтерди жана/же суроолорго, жоопторго байланышкан адамдык факторлорду четке кагуу маскатында);

Министрлик сынактык процесстерди уюштуруу бөлүгүн жана маалыматтык платформаны камсыз кылуу үчүн, аутсорсингке тышкы техникалык топту (сынактын комиссиясынан тышкары) жумушка тартат;

Сынактардын жүрүшү милдеттүү түрдө онлайн-трансляция жана сынактын баардык жол-жоболорун үн менен коштолгон видеого тартылып, түз эфирде Юстиция министрлигинин расмий баракчалары (YouTube, Facebook) аркылуу коомчулукка чагылдырылып турат.