Юстиция министрлигинде адвокаттык лицензияны алууга талапкер жактарга квалификациялык сынак өткөрүү үчүн компьютердик жабдууларды жана программалык камсыздоону өткөрүп берүү аземи болду

Бүгүн 2014-жылдын 8-октябрында Кыргыз Республикасынын Юстиция министрлигинде адвокаттык лицензияны алууга талапкер жактарга  квалификациялык сынак өткөрүү үчүн компьютердик жабдууларды жана программалык камсыздоону өткөрүп берүү аземи болду. Бул салтанаттуу иш-чарага Кыргыз Республикасынын Юстиция министри А.Шыкмаматов, Кыргыз Республикасында USAID миссиясынын директору Майкл Грин мырза, Юстиция министринин орун басары Ж.Мамбеталиева, Нотариат жана адвокатура башкармалыгынын начальниги М.Сейдалиева, Кыргыз Республикасынын Адвокаттар бирлигинин төрагасы Г.Кожомова, Америкалык юристтер ассоциациясынын (ABA ROLI) Укуктун үстөмдүгү   программасынын директору А.Керимбаев жана Эл аралык кызматташуу боюнча АКШ агенттигинин (USAID) дагы башка өкүлдөрү катышышты. Юстиция министри А.Шыкмаматов ЮСАИД миссиясынын директору  Майкл Грин мырзага берилген жабдыктар үчүн, ошондой эле программалык камсыздоону жаратуунун үстүнөн иштегендерге, сынактар суроолорунун маалыматтар базасын даярдагандарга, Кыргыз Республикасынын Юстиция министрлигинин бардык кызматкерлерине, адвокаттардын окуу борборуна,  ушул иш-чараны даярдоого жана үйрөтүүчү тренингдерди өткөрүүгө катышкан бардык кызматкерлерге ыраазычылык билдирди. «Компьютердик тестирлөөнү киргизүү менен азыркы көйгөйлөрдүн бардыгы чечилет - бул менен квалификациялык сынактарды өткөрүүнүн  ачыктыгы камсыздалат, адам фактору жана коорупция жоюлат, башкача айтканда ар бир талапкер жакшы даярданса, анда ал сынакты ийгиликтүү тапшыраарына ишенич болот. Мунун артынан адвокаттык ишмердүүлүк чөйрөсүнө  адвокаттык кесиптин маанисин түшүнгөн жана билген адамдар келишет», - деп белгиледи министр. Ошондой эле министр адвокатура институтун өнүктүрүү өлкөбүздө жүргүзүлүп жаткан сот реформасынын   бирден-бир түзүүчү элементи экениндигин белгиледи. Саламдашуу сөзү менен Майкл Грин мырза да сүйлөдү. Тараптар бири-бирине жасалган иштер үчүн ыраазычылык билдиришип мындан ары кызматташууга ишенишээрин айтышты.
Мөөрү

2014.10.08 16:24:09