Кыргыз Республикасынын Юстиция министрлиги тарабынан Кыргыз Республикасында нотариатты өнүктүрүүнүн келечектүү багыттары аныкталды

Кыргыз Республикасынын Юстиция министрлиги тарабынан 2015-2017-жылдарга Кыргыз Республикасында нотариат институтун өнүктүрүү Концепциясы бекитилди. Бул документ Кыргыз Республикасынын нотариалдык ишин координациялоо тутумун өнүктүрүүгө гана багытталган негизги  базалык принциптерди, милдеттерди жана максаттарды  өзүнө камтыбастан, бул чөйрөдөгү азыркы мыйзамдарды өркүндөтүү боюнча комплекстүү чараларды иштеп чыгууга багытталган.

Кыргыз Республикасында бүгүнкү күндө нотариат, жарандык юрисдикция тутумунда өзүнүн ордунун жоктугу, нотариаттын укук коргоо жана сот тутуму менен өз ара аракеттешүүсүндөгү дараметине  жеткире баа бербөө, нотариалдык иштин процедуралык-процессуалдык түзүүчүлөрүнүн жетишсиз иштелгендиги сыяктуу көйгөйлөр менен кезигүүдө. Бирок нотариат гана жарандардын жана юридикалык жактардын укуктарын жана мыйзамдуу кызыкчылыктарын сактоону, коргоону камсыздаган институт болуп саналат.

Бул Концепция нотариустардын чечимдерин соттун чечиминин деӊгээлинде карала тургандай кылып жарандык жүгүртүм чөйрөсүндөгү нотариустардын укуктук статусун жана ролун көтөрүү боюнча милдеттерди өзүнүн алдына коёт.  Ошол эле учурда ыйгарым укуктардын мындай кеӊейтилиши  квалификациялык талаптарды көтөрүү жолу менен нотариустун кызмат ордуна талапкерлерге көрсөтүлүүчү кызматтык чекшартты, окуу мөөнөтүн жана экзамендик тестирлөөнүн предметин кеӊейтүүнү милдеттендирет.

Көрсөтүлгөн кызматтардын сапаты, нотариалдык ишти өркүндөтүү жана жасаган аракеттери үчүн нотариустун жоопкерчилигин күчөтүүгө Кыргыз Республикасынын жарандык кодексине, Кыргыз Республикасынын “Нотариат жөнүндө” мыйзамына жана  нотариалдык ишти жөнгө салган башка ченемдик укуктук актыларга масштабдуу түзөтүүлөрдү киргизүү менен жетишүү пландалууда. Атап айтканда Кыргыз Республикасынын юстиция министрлиги менен аткаруу бийлигинин кызмат адамдарына кандайдыр-бир нотариалдык аракеттерди жүргүзүүгө тыюу салуу сунушталууда. Нотариалдык конторлор жок болгон жерлердеги калктуу пункттарда  нотариалдык кызматтардын жеткиликтүүлүгү мындай калктуу пунктка райондук нотариалдык конторанын нотариустарынын бирин бекитүү жолу аркылуу камсыздалышы зарыл болот. Ошондой эле мыйзамдык түзөтүүлөрдү кабыл алуунун жыйынтыктарынын дагы бири болуп милдеттүү нотариалдык күбөлөндүрүүгө жаткан бүтүмдөрдүн тизмегин кеӊейтүү болот.

Мындан тышкары, 2015-2017-жылдарга Кыргыз Республикасында нотариат институтун өнүктүрүү Концепциясы нотариаттын бирдиктүү маалымат тутумун жана бирдиктүү республикалык нотариалдык архивди түзүүнү болжолдойт. Бул бүткүл республика боюнча бардык катталган нотариалдык күбөлөндүрүлгөн документтердин толук элкетрондук базасын  түзүүгө гана мүмкүндүк бербестен, алардын талаптагыдай сакталуусун камсыздайт.