Кыргыз Республикасында укуктук маалыматтардын борбордоштурулган банкынын мобильдик версиясы иштей баштады

Бүгүн  2015-жылдын 17-ноябрында Кыргыз Республикасынын Юстиция министрлигинин  улуттук залында укуктук маалыматтардын борбордоштурулган банкынын мобильдик версиясын (МББ), ошондой эле  “Ачык маалыматтар”  интерфейсин (Open Data) Юстиция министри Жылдыз Мамбеталиеванын  жана «Демократиялык башкаруу» БУУӨП багытынын программалык лидери Александр Кашкаревдун катышуусу менен презентация кылышты.

Презентациянын катышуучулары менен саламдашкан соӊ Жылдыз Мамбеталиева мыйзамдардын акысыз электрондук базасын ишке киргизүүнүн максаты өлкөнүн жарандарын ченемдик укуктук актылар жөнүндө маалыматтар менен ыкчам камсыздоо болуп саналат деп билдирди.

 “Укуктук маалыматтарга эркин жетүүнүн жоктугу убакыттын өтүшү менен өзүнүн мыйзамдуу кызыкчылыктарын жактоо көндүмдөрүнүн жок болуусуна түрткү болгон калктын укуктук сабатсыздыгына алып келиши мүмкүн, бул калкты маргинализациялайт, азыркы шарттарда аны алсыз кылат,  ошондой эле социалдык чыңалуунун  жана коррупциянын өсүшү үчүн  ылайыктуу чөйрө түзөт”. Ошондуктан Юстиция министрлигинин алдына жарандардын  эч кандай чектөөсүз укуктук маалыматтардын борбордоштурулган банкына жетүү мүмкүндүгү үчүн ушундай мобильдик тиркемени иштеп чыгуу боюнча милдет коюлган”, - деп белгиледи министр.

Бүгүнкү күнгө чейин укуктук маалыматтардын борбордоштурулган банкы Юстиция министрлигинин расмий сайтында гана иштеп келген. Анын базасында 77 миӊден ашык ченемдик укуктук актылар камтылган: Кыргыз Республикасынын мыйзамдары, Кыргыз Республикасынын Президентинин жарлыктары, Кыргыз республикасынын Жогорку Кеӊешинин, Өкмөтүнүн, ошондой эле Кыргыз Республикасынын жергиликтүү өз алдынча башкаруу органдарынын токтомдору. 2015-жылдын башынан тартып МББга internet тармагы аркылуу 506 миӊ 092 компьютер колдонуучулар киришкен. Мобильдик версияны киргизүү менен OC Android, ошондой эле планшеттердин базасындагы мобильдик телефондун ар бир колдонуучусу каалаган жерден он-лайн режиминде ченемдик укуктук актылар жөнүндө акысыз, толук, ишенимдүү маалыматты ала алат.

Open Data интерфейси  тууралуу Жылдыз Мамбеталиева,   Өкмөттүн иштөө принциби болуп маалыматка жетүүдөгү максималдуу ачыктык саналаарын  белгиледи.  “Укук чөйрөсүндөгү Кыргыз Республикасынын маалыматтык ресурстарынын ачыктыгын камсыздоо боюнча чаралар көрүлүүдө. “Ачык маалыматтар  тутуму МББнын бардык ишин ачык, кайталап автоматтык жана автоматташтырып колдонуу үчүн жарактуу болгон, машина окуучу маалыматтар түрүндө  пайдаланууга мүмкүндүк берет”, - деп билдирди министр.

“Ачык маалыматтар” жана МББнын мобильдик тиркемеси  “КР сот адилеттигине жетүүнү кеӊейтүү” Финляндиянын ТИМ жана БУУӨП долбоорунун алкагында  Кыргыз Республикасынын Юстиция министрлигинин демилгеси менен иштелип чыккан. БУУӨПтүн “Демократиялык башкаруу” багытынын программалык лидери Александр Кашкарев, мындай  жаӊылык киргизүү жарандык коом үчүн укуктук маалыматка жетүүнүн эӊ жакшы булагы болооруна жана мамлекеттик органдардын ишинин майнаптуулугун көтөрөөрүнө толук ишеним артаарын билдирди.